Кыргыз Республикасынын Энергетика министрлиги жүргүзүп жаткан реформалардын алкагында борбор калаада кабелдик тармактарды жаңылоо иштери жүрүп жатат. 10 кВ линияларды алмаштыруу иштери «Энергетика тармагын модернизациялоо жана туруктуу өнүктүрүү» долбоорунун алкагында ишке ашырылууда.
Бүгүнкү күндө иштер Түштүк магистралдан жогору жайгашкан аймактарда, тактап айтканда, Мамлекеттик резиденциянын айланасында жана «Совмин» турак жай шаарчасында жүргүзүлүүдө.
2025-жылдын башынан бери Бишкекте 14 км ашуун кабелдик линиялар реконструкцияланды. Жыл аягына чейин мөөнөтү өтүп кеткен дагы 20–25 км линияларын алмаштыруу пландалууда. Долбоор төмөнкү максаттарды көздөйт:
• техникалык жоготууларды азайтуу,
• кабелдик тармактардын өткөрүмдүүлүгүн жогорулатуу,
• иштөө чыңалуусун 10 кВга өткөрүү, бул азыркы энергия үнөмдөө талаптарына туура келет.
Реконструкция учурунда узак мөөнөттүү жана ишенимдүү болгон полиэтиленден обочолонгон заманбап кабелдери колдонулууда.
Мындан тышкары, Бишкек шаардык электр тармактары ишканасынын кабелдик линия кызматы – ААК «КУЭТтин» филиалы тарабынан узундугу 10 кмден ашык жаңы кабелдик линия курулууда.
Маалымат үчүн: Модернизациянын алкагында 3×240 мм² жана 3×180 мм² жоондуктагы жаңы кабелдер төшөлүп жатат. Бул керектөөчүлөрдү электр энергиясы менен камсыз кылуунун сапатын жана туруктуулугун бир топ жогорулатат.
Эске салсак, кабелдик линияларды реконструкциялоо иштери «Энергетика тармагын модернизациялоо жана туруктуу өнүктүрүү» долбоорунун алкагында жүргүзүлүүдө. Долбоор Эл аралык өнүктүрүү ассоциациясы (IDA) жана Швейцариянын Экономика боюнча мамлекеттик секретариаты (SECO) тарабынан каржыланууда. Жалпысынан Бишкек шаарында 80 км 6/10 кВ кабелдик линияларды реконструкциялоо каралган, аткаруу мөөнөтү – 3 жыл.
